Mange bedrifter ser seg nøydde til å vere opne på dette og rette seg etter det dei veit er ein realistisk leveringsservice. Kanskje har dei erfaringstal som viser at dei berre kan levere til dømes 95 prosent av alle ordrar til avtalt tid. Årsakene kan vere både ustabile underleverandørar, forseinkingar i eigen produksjon eller krevjande distribusjon. Uansett kan det vere riktig å gjere denne reservasjonen overfor eigne kundar. Slik unngår vi å lage forventingar vi ikkje kan innfri, og vi kan unngå rettsleg ansvar ved forseinkingar.
Ta betalt for den beste servicen
Somme gonger er det også slik at ulike kundar har ulike krav – og betalingsvilje – når det gjeld leveringsservice. Vi dreg fordel av denne variasjonen når vi tek ein høgare pris hos dei kundane som er villige til å betale for den høgaste prioriteringa. Slik kan vi også hente inn kostnadene ved ekstraordinære tiltak for å halde fast på ein god leveringsservice.
Informasjon er god service
Dei fleste bedrifter organiserer i dag ordremottak og ordreoppfølging slik at både dei sjølve og kunden kan følgje prosessen frå bestilling til levering. Bestillings- eller produksjonsstyringssystemet til bedrifta vil kunne fortelje kvar vara faktisk er. Er ho hos ein underleverandør, på veg i en container eller på ein pall, under produksjon i eiga bedrift eller på veg ut til kunden? Kanskje ventar ho på ein manglande komponent? Kanskje ligg vara på ein terminal på Alnabru klar til vidare transport?