Boring omfattar alle metodar som blir utførte ved sponfråskjerande verktøy, og som lagar runde hòl i eit arbeidsstykke. Andre metodar kan vere brotsjing, nedboring og gjenging.
For å få full forståing for val av skjeredata relaterte til materiale er det viktig at du har tilgang til skjeretabellar, materiale og maskinar.
Definisjonar ved boring
Spindelhastigheita (n) er hastigheita på den spindelen der boret sit, og blir uttrykt i omdreiingar per minutt.
Skjerehastigheita (vc) blir oppgitt i meter per min (m/min). Denne blir henta frå tabellar, men kan òg enkelt reknast ut når ein kjenner talet på omdreiingar per minutt som boret har.
Matingshastigheita (vf − i mm/min) er matinga verktøyet har mot arbeidsstykket, alternativt matinga arbeidsstykket har mot verktøyet uttrykt i lengd per tidseining.
Mating per omdreiing (f − i mm/omdr) uttrykkjer forflyttinga av verktøyet i løpet av ei omdreiing og blir nytta ved utrekning av mating av verktøyet.
Spissvinkel og spiralvinkel på bor
Dei fleste bora har to sponkanalar og to skjerande eggar. Boresponen blir evakuert via sponkanalane. Sponbrytinga blir påverka av materiale, verktøygeometri, skjerehastigheit, mating og val av skjerevæske.
Som hovudregel gjeld at aukande mating og/eller minska skjerehastigheit gir kort borespon. Sponlengda er akseptabel dersom sponen kan transporterast ut gjennom sponkanalane på boret utan problem.
Arbeidsstykkets materialer | Spiralvinkel | Spissvinkel |
|---|---|---|
Ulegert og lavlegert stål, messing og plast | 20 - 30° | 118° |
Rustfritt stål | 20 - 30° | 130° |
Grått støpejern, stålstøpegods og adusert jern | 18 - 25° | 118° |
Aluminium, myk plast og kobber | 30 - 40° | 140° |
Hard plast og pleksiglass | 12° | 80 - 140° |
Sponvinkelen
Sponvinkelen er størst ute ved skjereeggen og minskar frå periferien mot sentrum av boret. På grunn av at skjerehastigheita minskar frå periferien mot sentrum av boret, der ho er null, vil den skjerande eggen arbeide ineffektivt ved borespissen.
Det som skjer, er at borespissen blir pressa og skavar bort materiale. I staden for å skjere dette bort, skjer det ein plastisk deformasjon, då sponvinkelen er negativ og skjerehastigheita går mot null.
Sjå figur.
Denne presserande effekten gir opphav til ein relativt høg aksiell kraftkomponent, som ikkje kan utnyttast, men som kan føre til at arbeidsstykket fjører eller bøyer seg. Dette problemet kan ein unngå ved å slipe boret på ein spesiell måte, slik at lengda på tverrskjeret blir redusert.
Skjerehastigheiter
I tabellen finn du ei oversikt over anbefalte skjerehastigheiter i meter per minutt. Dei oppgitte data gjeld for HHS-bor.
Materiale | Mating mm/o - 0,15 | Mating mm/o - 0,30 |
|---|---|---|
St-42 | 40 | 30 |
St-52 | 35 | 25 |
St-60 | 35 | 25 |
Seigherdingsstål | 25 | 15 |
Rustfritt stål | 15 | 10 |
Grått støpestål | 30 | 20 |
Støpestål | 30 | 20 |
Messing | 70 | 50 |
Aluminium | 120 | 80 |
Nylon | 100 | 75 |
Bakelitt | 100 | 75 |
PVC | 100 | 75 |