Rekneskap og budsjett
Det er fornuftig å lage eit budsjett for dine eigne inntekter og kostnader. Eit slikt budsjett kan gjelde for neste månad eller for ein lengre periode. Det er òg fornuftig å følgje med på korleis det går undervegs, og å gjere opp status når perioden er over.
Du lagar altså ein plan for din eigen økonomi. Dersom du også noterer korleis det verkeleg gjekk i perioden, har du ein rekneskap. Då er det lett å samanlikne budsjettet med rekneskapen. Differansen kallar vi avvik.
Med ei slik samanlikning forstår du lettare kvifor økonomien din blei som han blei, kva som gjekk betre, og kva som gjekk dårlegare enn planlagt.
Ser du forskjellen på eit budsjett og ein rekneskap? Eit budsjett er eit forsøk på å seie noko om framtida, medan ein rekneskap seier noko om fortida.
| Budsjett | Rekneskap | Avvik | |
|---|---|---|---|
| Inntekter | |||
| Månadslønn | 1 000 | 1 100 | +100 |
| Lommepengar | 500 | 500 | 0 |
| Sum inntekter | 1 500 | 1 600 | +100 |
| Kostnader | |||
| Mobil | 300 | 350 | –50 |
| Mat i kantina | 100 | 150 | –50 |
| Klede | 250 | 200 | +50 |
| Kafé, kino | 100 | 200 | –100 |
| Busskort | 100 | 100 | 0 |
| Diverse | 150 | 200 | –50 |
| Sum kostnader | 1 000 | 1 200 | –200 |
| Til overs | 500 | 400 | –100 |