Oppbygging av saka
Ei avissak blir bygd opp med tittel, ingress, brødtekst, bilete og bilettekst. Det er viktig at det er samanheng mellom dei ulike elementa. Gjennom ein tydeleg tittel og ingress skal journalisten vekkje interesse, og lesaren skal få nok informasjon til å vite kva saka handlar om. Brødteksten gir fleire detaljar og meir utfyllande bakgrunn om saka.
Den omvendte pyramiden
Journalisten vel skrivemodell ut frå kva type sak ho eller han jobbar med. Nyheitsartiklar blir stort sett skrivne etter skrivemodellen den omvende pyramiden. Her blir den viktigaste informasjonen presentert først, i tittelen og ingressen.
Sjølve hovudpoenget kjem i tittelen. Ingressen skal innehalde sentrale og viktige opplysningar, som kven og kva saka handlar om. I brødteksten gir journalisten fleire detaljar og bakgrunn for saka. Opplysningane i saka blir altså sortert etter kva som er viktigast, det minst viktige skal stå til slutt.
Fisken
Reportasjen har ei anna oppbygging. Veldig ofte blir skrivemodellen fisken brukt. Fisken har eit hovud og ein kjeft med eit kraftig bitt. Saka byrjar med eit anslag eller ei fengjande opning som er interessevekkjande.
Midtpartiet, eller kroppen til fisken, gir utdjupande og forklarande informasjon. Eit godt poeng blir gjerne spart til slutt og kan samanliknast med ein snert med halestykket.
Omgrep
- Tittel: signaliserer kva saka handlar om
- Byline: namnet på den som har skrive saka
- Ingress: gir svar på dei viktigaste spørsmåla lesaren har, maks. 30 ord
- Brødtekst: utdjupande tekst som er delt opp i avsnitt
- Mellomoverskrift: ei mindre overskrift som markerer eit hovudavsnitt i brødteksten og seier noko om innhaldet i avsnittet
- Bilettekst: fortel kva biletet viser og gir utdjupande informasjon