Sikker jobb-analyse – SJA

Opne bilete i eit nytt vindauge

CC BY-NC

Bilete: Norsk Olje og Gass

Sikker jobb-analyse (SJA) blir brukt når det finst risikoelement som må belysast før eit arbeidsoppdrag kan starte. Det er utarbeidd felles retningslinjer for SJA som forklarer når og korleis ein SJA skal brukast:

Norsk olje og gass: 090 – Norsk olje og gass. Anbefalte retningslinjer for felles modell for sikker jobb analyse (SJA)

Sikker jobb-analyse blir gjennomført i eit møte. Der skal områdeansvarlege, skiftleiar og utførande personell delta. Nokre gonger deltek òg ein representant frå HMS-leiinga om bord.

Jobben blir delt opp og vurdert for risikoelement. Når vi identifiserer ting som kan gå gale, kallar vi det ein risiko. Risiko skal reduserast ved hjelp av tiltak. Vanlege tiltak for å redusere risiko er sperringar, trygging, vakthald, stenging av system, stopp i andre aktivitetar i nærleiken og så vidare. Det er slike tiltak som skal kome fram i analysen av arbeidet.

Tiltaka skal førast inn i SJA-skjemaet, og deltakarane skal signere på SJA-en. Tiltaka skal setjast inn før arbeidet kan starte. Under utføring av jobben skal kvar enkelt arbeidar likevel vere merksam og vurdere sin eigen og andre sin tryggleik.

I SJA-prosessen blir det utført ein risikoanalyse. Vi vurderer kva som kan skje undervegs i arbeidet, kor stor konsekvens det kan få, og kor stort sannsyn det er for at det kjem til å hende. Mange bedrifter bruker ei risikomatrise som hjelp til analysen.

CC BY-NC-ND

Bilete: Norsk olje og gass

Ein risikoanalyse blir berre god når alle deltek med forståinga si og tankane sine om arbeidet som skal utførast. Det er kompetansen din i faget som avgjer om jobben er godt nok analysert, om tiltaka er gode nok, og om risikoreduksjonen er god nok.

Arbeidstilsynet: Risikovurdering

SJA-skjemaet krev at du tenkjer på jobben slik han skal utførast (plan), og alle skal prøve å finne moglege farar.