EU-delegasjonen er ein norsk utanriksstasjon (på line med t.d ambassadar) og er spesiell fordi det finst utsendingar frå nesten alle dei norske departementa der.
Delegasjonen utgjer den største utanriksstasjonen til Noreg med heile 55 medarbeidarar. 35 av desse er diplomatar. Ein tredel er utsendingar frå Utanriksdepartementet, medan dei andre kjem frå dei andre departementa.
Oppgåver
Oppgåva til EU-delegasjonen er å representere regjeringa andsynes EU på alle EU-relaterte område som har noko å seie for Noreg. Delegasjonen skal mellom anna:
- Følgje utviklinga i EU på område som er spesielt viktige for Noreg. Dei analyserer den politiske utviklinga og informerer departementa heime.
- Dei skal fremje norske bidrag, synspunkt og innspel andsynes institusjonane til EU. Dei arbeider også opp mot EFTA-sekretariatet og ESA, overvakingsorganet til EFTA-landa.
- Delegasjonen skal hjelpe til med å finne ut korleis Noreg kan handle innanfor dei ulike samarbeidsavtalane vi har med EU.
- Arbeide for auka kunnskap og kompetanse om EU- og EØS-spørsmål i Noreg, og andsynes dei som vitjar EU-delegasjonen eller tek kontakt på ein annan måte. Mange norske elevar vitjar EU-delegasjonen på studietur til Brussel, og får informasjon om arbeidet til delegasjonen.
Å følgje utviklinga i EU på område som er aktuelle for EØS-avtalen, som den indre marknaden, og Schengen-samarbeidet, er særleg viktig for Noreg.
Kjelde: Om delegasjonen, Europaportalen.
Andre norske aktørar i Brussel
Det er mange norske representantar i Brussel, og organisasjonar og selskap har eigne kontor der. Med det store norske nærværet i Brussel, ser vi at mange aktørar ser at det er naudsynt å vere i nærleiken av der ein tek avgjerder. Avgjerder som har noko å seie for norske verksemder og interesser.
Mellom dei norske aktørane som har kontor i Brussel er LO og NHO. Det same har Bellona og Flyktningehjelpa. Av norske selskap er mellom anna SAS, Statnett, Statoil og Hydro til stades i den belgiske hovudstaden. I tillegg har regionane sine Europakontor, som Trøndelags Europakontor, Vest-Noregs Europakontor og NorthNorway European Office. Mediehusa har sjølvsagt også korrespondentane sine her.
Fullstendig oversikt får du her: Norske aktørar i Brussel