Trinn 5: Åtferd etter kjøpet
Eiga erfaring med eit produkt er den viktigaste kjelda for informasjon. Med tanke på framtidig kjøpsåtferd er det derfor svært viktig at kunden er tilfreds med produktet.
Klarer marknadsføraren å skape samsvar mellom kunden sine forventningar til og opplevingar av eit produkt, skaper han gjerne merkelojalitet, og dermed ofte gjenkjøp av produktet. Blir kjøparen derimot misnøgd, snakkar vedkommande med andre moglege kundar og spreier negativ omtale av vara. Det fører til at bedrifta mistar både denne kunden og andre potensielle kundar.
For å unngå dette bør seljaren følgje opp salet. Det kan skje på fleire ulike måtar. Kunden kan oppfordrast til å ta kontakt med seljaren dersom ho er misnøgd (reklamasjon), eller seljaren kan sjølv halde fram med å gi støttande informasjon.
Seljaren kan følgje opp kunden på e-post ved å halde fram med å sende opplysningar om kor godt produktet er. Kanskje kjem det forbrukartestar som stadfestar kvaliteten på produktet, og som seljaren kan sende til kjøparane?
Vi veit at forbrukarane held fram med å lese annonsar etter kjøpet for å bli overtydde om at dei gjorde det beste valet, og det er derfor lurt å støtte opp under dette.
Kva etterkjøpsåtferd har ein ungdom som har kjøpt seg ny vinterjakke? Kva etterkjøpsåtferd har ein bilkjøpar?