Frivillig i utviklingsland
Norsk ungdom kan reise til mange land i blant anna Afrika, Asia og Sør-Amerika og kombinere grøn turisme med korte arbeidsoppdrag på natur- og miljøprosjekt. Tanken er at du kan få ei unik oppleving som frivillig i utlandet samtidig som du gjer ein innsats som kjem til nytte i eit lokalsamfunn.
Ulike produkt og segment
Berekraftig utvikling står høgt på den politiske dagsordenen i store delar av verda. Reiselivsnæringa er ein av dei største industriane i verda. Ei rekkje organisasjonar og verksemder arbeider med berekraftig turisme (sustainable tourism).
World Travel & Tourism Council (WTTC)
World Travel & Tourism Council (WTTC) er ein global organisasjon. Organisasjonen har som mål å auke kunnskapen om reiseliv og turisme. WTTC har markert seg sterkt for eit miljøvennleg reiseliv.
Morgondagens turisme – Tourism for Tomorrow
WTTC er ansvarleg for Tourism for Tomorrow-prisane som blir delte ut kvart år. Målet med prisutdelinga er å løfte fram dei beste døma på berekraftig reiseliv og gi dei internasjonal merksemd.
I 2012 fekk Destinasjon Røros tildelt ein pris for arbeidet sitt med berekraftig reiseliv. Dei fekk prisen fordi arbeidet deira med eit berekraftig reiselivsutviklingsprogram tek opp i seg sosiale, kulturelle, miljømessige og økonomiske forhold for dei mange ulike aktørane og interessentane i reiselivet i regionen.
Du kan lese meir her.
National Geographic Society
Ein av dei største ideelle vitskaps- og utdanningsinstitusjonane i verda, National Geographic Society, har lansert omgrepet geoturisme. Geoturisme er ei form for turisme som «tek vare på, styrkjer og framhevar den lokale eigenarten ved ein stad – miljø, kultur, estetikk, kulturarv – og som kjem lokalsamfunnet til gode».