Bakgrunn
Regelverket for sikring av last er forankra i dei fysiske lovene og ein hypotese om kor store krefter som kan oppstå og verke på transportmiddelet.
Tog
Tenk deg gods på ei jernbanevogn som treffer ei anna vogn. Fartsendringa blir veldig stor på kort tid, og kreftene som skal halde igjen godset, blir enormt store.
Båt
Eit skip i høge bølger vil rulle eller stampe – det rullar sidevegs og stampar når det går mot bølgene. Desse kreftene er sterke og verkar også inn på lasta. På sjø kan krava til sikring vere ulike alt etter kva fartsområde lasta skal transporterast i. Til dømes kan Nordsjøen, Austersjøen og Atlanterhavet ha ulike reglar og krav. Skal transporten gå gjennom fleire fartsområde, må ein sikre etter dei strengaste krava.
Fly
I Noreg blir lasta i fly sikra etter føresegnene som er gitt i forskrift om transport av gods i luftfartøy og regelverk for norsk sivil luftfart, sjå lenkesamlinga under. Lasta ligg ofte i igloar, som er små konteinarar som er tilpassa flytypen, og igloane blir så låste fast i flyet.