Blomkål

Opne bilete i eit nytt vindauge

CC BY-NC-SA

Bilete: Fredrik Solstad

Botanisk sett er blomkålen litt spesiell sidan han består av mange små samanvaksne blomsterbukettar. Han er dermed ein uutvikla blomsterstand omkransa av grøne blad, og det er dette som har gjort at han har fått namnet blomkål, som tyder kålblomster eller blomstrande kål. Blomkål er mild på smak med sprø konsistens i bukettane.

CC BY-NC-SA

Bilete: Caste

Blomkål er nydeleg kokt, gratinert, frityrsteikt og i kremar, supper, gratengar, gryter, wok og stuingar. Rå blomkål i små bukettar er godt i salatar eller som snack. Blomkål i tjukke skiver er nydeleg å grille. Raspa blomkål kan brukast i staden for ris.

Blomkålhovudet skal vere fast, tett og sprøtt. Fargen skal vere kvit eller kremfarga. Blada skal vere friske og sprø utan teikn til misfarging eller at dei losnar. Blomkål treng varsam behandling. Han får elles lett mørke flekker.

Blomkål har både lågt energiinnhald og lågt feittinnhald. Blomkål har eit høgt innhald av protein, vitamin C og kostfiber.

Sjå Matvaretabellen frå Mattilsynet for nærare opplysningar om næringsinnhaldet.