Nepe
Tidleg hausta nepe er ei velsmakande delikatesse med sin milde og nydelege smak. Viss nepa får vekse lenger, blir ho større, og smaken blir beisk og konsistensen hard eller treen. Neper finst også i fleire variantar, og forma kan vere rund, oval eller avlang.
Bruksområde
Vi skreller nepa før bruk. Ho kan rivast og nyttast til råkost eller i salat, eller ho kan skjerast i skiver, kokast i lettsalta vatn og gjerne serverast med smør eller nyttast som tilbehøyr til kjøt. Nepa kan også stuast, gratinerast eller vere ingrediens i gryter eller supper.
Kvalitetskrav
Neper blir selde i buntar og skal vere kvite, gjerne med ein fiolett, grøn eller gul farge øvst rundt bladfestet. Dei skal vere heile, reine, harde og fri for skadar og sliming.
Næringsinnhald
Nepa er kalorifattig. Ho inneheld noko C-vitamin, jern og kalsium.
Sjå Matvaretabellen frå Mattilsynet for nærare opplysningar om næringsinnhaldet.
Hugselappen
Norsk sesong:
juni–desember
Med andre ord:
latin: Brassica rapa subs. rapa
engelsk: turnip
tysk: Mairübe
fransk: navet
Lagring:
0–2 °C. Neper som er hausta tidleg, eignar seg ikkje for langtidslagring og må lagrast kjølig og mørkt med høg luftfukt.