Pærer
Pærer krev eit varmare og tørrare klima enn eple, og produksjonen i Noreg er liten. Dei fleste pærene er grøne i skalet, men det finst også raude, brune og gulgrøne. Fruktkjøtet er kvitt og hardt før pæra er mogen. Mogen pære er mjuk og saftig med aromatisk smak.
Bruksområde
Vi et pærer naturell. Dei smakar best mogne, og dei ettermognar lett i romtemperatur om dei er harde. Er pæra mogen, bør ho ikkje liggja lenge før ho vert eten. Pære passar fint som mellommåltid, etter eit måltid eller saman med ost. Pære kan også nyttast i fruktsalat, bakverk, dessertar eller paiar, eller dei kan hermetiserast.
Kvalitetskrav
Pærer skal vera faste i konsistensen og fri for støytskadar. Dei skal vera heile, ha stilken på og ikkje visa teikn til innskrumping eller mørke flekker i skalet. Kvaliteten kan variera etter sort og dyrkingsstad. Form, farge og smak skal vera typisk for sorten, og storleiken i kassa skal vera jamn.
Næringsinnhald
Pæra er fiberrik og mager. Ho inneheld litt mineral og vitamin.
Sjå Matvaretabellen frå Mattilsynet for nærare opplysningar om næringsinnhaldet.
Lagring
1–2 °C. Kor haldbare pærer er, kan variera ein del alt etter sort, dyrkingsland og lagringsvilkår. Det er viktig å halda temperaturen så låg som råd og ha rett luftfukt.
Norsk sesong
September til oktober.