Raudkål
Raudkålen er i slekt med andre kåltypar som savoikål, rosenkål, blomkål og brokkoli, og dessutan med sennep og karse. Som dei fleste kålsortar er raudkål ein stor knopp sett saman av tettpakka blad.
Raudkål toler det harde klimaet i Noreg og eignar seg derfor godt til både dyrking og langtidslagring. Raudkål har stort sett dei same eigenskapane som hovudkål; det er fargen som skil dei. Blada er raudlilla, og bladnervane og stilken er kvite. Fargen kjem frå eit stoff som heiter antocyanin. Dette stoffet finst òg i andre kålartar, men i mindre grad. Smaken er karakteristisk og mild.
Bruksområde
Raudkål blir nytta på same måten som hovudkål: rå og finskoren i alle typar salat, til supper og som tilbehøyr til middagsretter. Han kan kokast, smørdampast, steikjast, syltast eller wokkast, eller vi kan fylle han og nytte han til stuing. Raudkål er dekorativ og set fin farge i råkostsalat. Raudkål eignar seg godt til å lage surkål av, gjerne saman med eple.
Kvalitetskrav
Raudkål skal ha tett knytte, tunge hovud med glatte ytterblad. Kålhovudet skal vere heilt, utan sår eller flengjer. Blada skal vere flekkfrie og ha ein frisk farge, og stokken skal vere avskoren tett under bladfestet. Kålen skal vere fri for jord og insekt.
Næringsinnhald
Raudkål er kalorifattig og inneheld ein del A- og C-vitamin i tillegg til fiber.
Sjå Matvaretabellen frå Mattilsynet.
Hugselappen
Norsk sesong:
august–februar
Med andre ord:
latin: Brassica oleracea var. capitata
engelsk: red cabbage
tysk: Rotkohl
fransk: chou rouge
Lagring:
0–2 °C. Raudkål er svært haldbar og toler langtidslagring under optimale lagringsforhold.