Gjedde
Sesong
Gjedda vert som regel fiska med stong, heile året. Det er ein populær sportsfisk, og den største gjedda som er teken på sportsfiskereiskap i Noreg, vog 18,74 kg. Rekorden vart sett i Øyeren 19. november 2011.
Utbreiing
Gjedda er ein ferskvassfisk, og lever i område på Austlandet, i Trøndelag, Troms og Finnmark. På 1900-talet vart det sett ut gjedde i vatn og elvar på Vestlandet. Ho finst òg i brakkvatn.
Med andre ord
Latin: Esox lucius
Engelsk: Northern Pike
Tysk: Hecht
Fransk: Grand brochet
Gjedda held ofte til på stader med mykje vegetasjon som vassliljeblad og siv. Ho har skarpe tenner og et det meste ho kjem over av andre fiskar, frosk, vånd og mindre vadefuglar. Gjedda er ein hurtig fisk som gjer lynraske utfall mot byttedyr. Ho står ofte roleg i vegetasjonen og ventar på at eit passande bytte skal koma forbi. Om vinteren trekkjer gjeddene ofte ut på djupare vatn. Gytetida er i perioden april–mai.
Bruk
Gjedda eignar seg veldig godt som steikt servert med asparges og sennepssaus, dampa i supper, patear, fiskepudding og som nydelege gjeddekaker.
Ho er ein lys fisk med ein roleg og god smak, den rake motsetnaden til gjedda si åtferd og utsjånad. Fiskekjøtet er fast og litt grovt.
Næringsinnhald
Gjedda er ei god kjelde til protein og kalium.
Sjå Matvaretabellen frå Mattilsynet for nærare opplysningar om næringsinnhaldet.