Daennie sæjrosne gyhtjelassh abpe teemese Argumentasjovne. Jis maahtah gaajhkide gyhtjelasside vaestiedidh dellie datne hijvenlaakan teemine barkeme.
1. laavenjasse
Iktedimmie-gyhtjelassh
Daajrah vaestiedassem dejtie gyhtjelasside vuelielisnie? Jis maahtah dellie datne hijvenlaakan barkeme teemine argumentasjovnen bïjre!
- Mij sæjhta jiehtedh argumenteradidh?
- Buerkesth dïejvesidie veanhtoe, argumeente jïh premisse.
- Mah golme krïevenassh byörebe bïejedh akten rïektese-argumeentese?
- Mijjieh joekehtibie ræhpas jïh tjeakoes argumentasjovnen gaskem. Mij joekehtse dej göökte argumentasjovne-hammoej gaskem?
- Retorihkesne jallh soptsestimmie-kåanstesne nuhtjebe dïejvesidie etos, logos jïh patos
sijjeste ræhpas jïh tjeakoes argumentasjovne.
a. Mij lea sisvege dejnie golme dïejvesinie?
b. Mij dïejvesidie lea seamma goh ræhpas argumentasjovne?
c. Mah dïejvesh leah seamma goh tjeakoes argumentasjovne? - Gosse logiske sjæjsjalimmieh vaeltebe dellie premissh bæjjese bïejebe jïh konklusjovnh darjobe våaroemisnie dejstie. Vedtieh aktem vuesiehtimmiem daejtie:
a. akte hijven logiske sjæjsjalimmie
b. akte nåake logiske sjæjsjalimmie
2. Laavenjasse
Åssjaldahke-kaarhte – tjeakoes argumentasjovne
Åssjaldahke-kaarhte göökte njieptjiejgujmie: 1. Njieptjie: teema, 2. Njieptjie: åejvie-væhta.
Lissehth åssjaldahke-kaarhtese bijjielisnie njieptjie 3-væhtajgujmie (daate sæjhta jiehtedh vuelievæhtah dejtie golme åejvie-væhtide). Nuhtjh aktem åssjaldahkekaarhte-dïrregem datne damth, jallh tseegkh aktem utnijem sijjesne creaza.com jïh nuhtjh dom namhtah åssjaldahkekaarhte-dïrregem Mindomo – aelhkie nuhtjedh jïh tjïelke jïh fryöjstehke åssjaldahke-kaarhth dorje.
Datne maahtah jïjtjedh vuelie-væhtah darjodh, jallh væhtah nuhtjedh læstoste vuelielisnie. Men geehth, juktie eah leah gaajhkh væhtah læstosne mah edtjieh meatan årrodh åssjaldahke-kaarhtesne tjeakoes argumentasjovnen bïjre!
- Analogije-raerie
- Ryöktesth soptsestimmie dåastoejasse
- Haesteme
- Maehtehtje-raerie
- Aktelaaketje argumentasjovne
- Jiermie-raerie
- Jienebelåhkoe-raerie
- Nænnoesvoete
- Lustesvoete
- Ironije
- Konklusjovne
- Logiske galhkuve
- Mijnuse-baakoe
- Saernie
- Persovne
- Plusse-baakoe
- Premisse
- Maerelesvoete
- Retorihkeles gyhtjelassh
- Luptestimmie
- Gïeleldh guvvieh
- Veanhtoe
- Veaksehkevoete
- Aerpievuekie-raerie
- Mearhkan sïjse bïejedh
- Aarvoe-raerie
3. Laavenjasse
Argumentasjovne-raerie
Darjoeh aktem kolonne-notaatem gusnie tjaalah argumentasjovne-raeride mej bïjre lïereme daennie teemesne, jïh tjaelieh våålese göökte vuesiehtimmieh fierhten argumentasjovne-raaran. Datne maahtah vuesiehtimmieh teemesne nuhtjedh, jallh datne maahtah jïjtse vuesiehtimmieh gaavnedh.