Fagstoff

Joejkemen bïjre

Joejke-teeksth leah saemien båarasommes aerpievuekien lidteratuvrh. Saemien aerpievuekesne joejke vihkeles sijjiem utni jïh åtna. Joejke lij aaj vihkeles saemien aerpievuekien jaahkosne jïh dovletje jïh daaletje bïevnesh saemien siebriedahken bïjre vadta.

Joejkh jïh joejkedh

Joejkh leah saemiej jïh dej jieledi bïjre. Almetjh eatnemem, båatsoem jïh almetjem joejkestieh. Eatneme jïh joejke leah tjarke sinsætnan ektiedamme. Joejke maahta dååjresem eatnamistie, juvrijste jallh almetjistie soptsestidh jïh buektedh.

Sveerjesne Karl Tirén (1869-1955) joejkh golteli jïh daejtie tjeeli novtapaehpierasse. 1960-låhkosne Israel Ruong Sveerjen Raadijovisnie barki jïh Saepmien mietie vöölki jïh båeries joejkh golteli jïh tjoejebaantese tjöönghki. Aktem daejstie lij Åvlavuelien råantjoeh jallh Renhjorden på Oulavuolie maam Nils Mattias Andersson joejkesti.