Fagstoff

Tjåanghkoe-gohtjedimmie jïh tjåanghkoe-referaate

To personer sitter foran en mikrofon. Foto 

Tjåanghkoeh utnebe gellie såarhts fåantoej gaavhtan. Maahta årrodh dan åvteste edtjebe barkoem soejkesjidh, aktene dåeriesmoeresne sjeakodh jallh dååjrehtimmieh jïh daajroeh låtnoehtidh. Ihke tjåanghkoe edtja åssjalommesen mietie årrodh byöroe tjåanghkoe-gohtjedimmiem jïh tjåanghkoe-referaatem tjaeledh. Dastegh edtjh tjåanghkose gohtjedidh, dellie tjåanghkoe-gohtjedimmiem tjåanghkoen åvtelen tjaalah dejtie mah edtjieh meatan årrodh. Tjåanghkosne akte almetje tjåanghkoe-referaatem tjaala. Tjåanghkoe-referaate edtja årrodh dan bïjre maam almetjh tjåanghkosne jeahteme jïh nænnoestamme.

 

Tjåanghkoe-gohtjedimmie

Seedth tjåanghkoe-gohtjedimmiem aareh, sïejhmemes akten våhkoen tjåanghkoen åvtelen, guktie gaajhkesh mah gohtjedimmiem åadtjoeh maehtieh meatan årrodh jïh maehtieh aamhtesigujmie åahpenidh. Gosse tjåanghkoe edtja stoerre aamhtesh digkiedidh, dellie daamtaj aamhtese-paehperh aaj seedtie.

 

Guktie gohtjedimmiem tjaeledh jïh sisvege

Maahtah gohtjedimmiem tjaeledh goh akte byjjes prievie. Daah væhtah edtjieh meatan årrodh:

  • man såarhts tjåanghkose bööredh 
  • gïeh gohtjedimmiem åådtjeme 
  • gie tjåanghkose gohtjede
  • gusnie jïh gåessie tjåanghkoe edtja årrodh, jïh man guhkiem tjåanghkoe edtja vaesedh
  • mah aamhtesh dijjeieh edtjede digkiedidh

Tjåanghkoe-referaate

Tjåanghkoe-referaate lea dïhte tjaaleldh vihtienasse mij soptseste maam almetjh jeehtin jïh nænnoestin tjåanghkosne. Referaatem tjuara tjaeledh jïh seedtedh dan varke gåarede. Referaatesne tjuara nuekies bïevnesh årrodh guktie akte almetje mij ij leah stïeresne orreme tjåanghkosne, maahta dam nuhtjedh juktie aamhtesigujmie jïh nænnoestimmiejgujmie åahpenidh.


Guktie edtjh referaatem tjaeledh jïh referaaten sisvege

Gosse tjåanghkoe-referaatem tjaalah tjoerh saakeles årrodh jïh ih jïjtjedh mïeligujmie båetedh. Tjåanghkosne datne tsiehkie-baakoeh tjaalah, jïh dan varke goh gåarede tjåanghkoen mænngan datne notaatide tjaebpebe tjaalah. Daah væhtah edtjieh iktesth meatan årrodh: 

  • magkeres tjåanghkoen bïjre referaate lea
  • gåessie jïh gusnie tjåanghkoe lij
  • gïeh lin stïeresne tjåanghkosne
  • mah aamhtesh tjåanghkoe digkiedi, jïh mah nænnoestimmieh dorjesovvin 
  • refereenten nomme
Lissine daejtie vïjhte åejvie-væhtide såemies jeatjah bïevnesh aaj maehtieh meatan årrodh, goh akte læstoe dejgujmie mah edtjieh referaatem åadtjodh, jïh tïjje jïh sijjie minngeben tjåanghkose

 

Baakoeh

 tjåanghkoe-gohtjedimmie

 møteinnkalling

 tjåanghkoe-referaate

 møtereferat

 stïeresne

 (er) til stede

 jïjtjedh mïeligujmie

 dine egne meninger

 tsiehkie-baakoeh

 stikkord

 åejvie-væhta

 hovedpunkt

 tjaaleldh vihtienasse

 skriftlig bevis