Fagstoff

Verbi bïjre

Bïenje, lasth, maanah jïh goese-råhtoe. Guvvie.

Verbe soptseste mij heannede jallh mij dorjesåvva, maam gie jallh mij dorje, mij sjædta jallh ajve heannede. Daennie sæjrosne datne vielie dej verbi ovmessie hammoej bïjre lïerh, dej finihte verbi jïh dej infinihte verbi hammoej bïjre.

 

Vuesiehtimmieh:

  • Maanah stååkedieh.
  • Bïenje guarjesje.
  • Lasth vyskedieh.
  • Tjuatsa.

 

Finihte jïh infinihte verbh

Joekedehtieh finihte jïh infinihte verbe-hammoej gaskem. Dah finihte verbe-hammoeh leah gåessie mijjieh dejtie verbide sojjehtibie. Dah infinihte verbe-hammoeh leah gåessie ibie dejtie sojjehth.


Finihte verbh

Finihte verbi sojjehtimmie-hammoeh:

  • Moduse: Indikatijve jïh imperatijve
  • Tïjje: Presense jïh preteritume
  • Persovne: 1., 2. jïh 3. persovne
  • Taale: Singularise (aktentaale), dualise (guektientaale) jïh pluralise (gellientaale)

Infinihte verbh

Verbh mah eah leah finihte verbh, dah leah infinihte. Verbi infinihte hammoeh leah daah verbe-hammoeh mah eah leah sojjehtamme.


Gååvnesieh daah infinihte hammoeh:

  • Infinitijve
  • Progressijve (gerundiume)
  • Perfektume partisihpe
  • Nyöjhkeme-hammoe
  • Verbe-genitijve (vuekie-hammoe)

Learoe-baalkah

 

Daennie teemesne göökte learoe-baalkah mejgujmie maahtah barkedh:

  • Finihte verbh
  • Infinihte verbh