Ella Holm Bull
Åemie Ella Holm Bulle dikte-gærjam Ov-messie darjomes bæjhkoehti jaepien 2000. Ibie daejrieh gåessie åemie Ella diktide tjeeli, men maehtebe sovmedh dïhte diktide tjeeli dej minngemes jaepiej åvtelen gærja bæjhkoesovvi.
Jis sovmebe åemie Ella Holm Bull diktide tjeeli 1990-låhkosne, dellie tjaelije ij lij vielie dan noere. Gosse diktem Mov håhkoe lohkebe dellie ov goh tjaelije arhteminie sov maana-baelien gåatan båetedh. Dïhte dan mojhtesi bïjre tjaala mah vaajmosne.
Numhtie guktie åemie Aanna Jacobsen ikth tjeeli: «Båeries vijsies almetjh hov jiehtieh: Almetjh guhth dovletjem vaajmosne jïh mojhtesisnie guedtieminie, dah gujht rïekteslaakan edtjieh maehtedh dåastodh mij båetiemisnie.»
Dikten vierhkie-vierhtieh
Gïele lea tjaelijen vierhtieh. Tjaelije maahta gellie ovmessie gïeleldh vierhkie-vierhtieh nuhtjedh gosse teeman bïjre tjaala. Lohkh diktem eensilaakan jïh dle kaanne guarkah mij dikten teema, jïh maam tjaelije sæjhta diktine jiehtedh.
1. laavenjasse
Lohkh diktem Mov håhkoe eensilaakan. Mij lea dikten teema?
2. laavenjasse
Maam vïenhth åemie Ella Holm Bull sïjhti diktine jiehtedh?
3. laavenjasse
Mah aarvoeh vihkeles diktesne?
4. laavenjasse
Maahtah maam akt jiehtedh tïjjen bïjre? Guktie saemien seabradahke lij 1990-låhkosne?
Gaaltije: Jacobsen, Aanna, (1997) Don jih daan bïjre I. Daasta berteme