Mij nomene?

Åpne bilde i et nytt vindu

CC BY-SA

Bilde: Helen Blind Brandsfjell

Substantijve lea aate, almetje, dahkoe jallh mij akt maam ussjedibie lea konkreete jallh abstrakte ektievoete, guktie vuesiehtimmien gaavhtan:

maana, tïjje, aavoe, gåetie, åssjele

Substantijven lea daamhtaj bijjie-lïhtse substantijve-jiehtieginie. Maehtebe raajesisnie utnedh substantijvh adjektijvh, pronovmenh jïh taale-baakoeh vuelie-lïhtseginie.

Gïehtjedh raajesem: Daah golme bïenjh

Baakoe bïenje maahta pronovmenem daate, taale-baakoe golme jïh adjektijve onne vuelie-lïhtseginie utnedh, daah golme onne bïenjh mij lea ektievoete raajesisnie.

Pronovmene sæjhta jiehtedh substantijven sijjeste. Dïhte dan goerkesem åådtje substantijveste jallh tsiehkeste gusnie dam utnebe. Maehtebe teeksteste lohkedh mij substantijvide dïhte pronovmene vuesehte. Maehtebe aaj mïss'akt tjuvtjiedidh jïh dan mænngan pronovmenem utnedh. Pronovmene seamma vuekine sojjehtibie substantijvine. Raajesisnie pronovmene seamma sijjesne deavhta substantijvine, men ij maehtieh vuelie-lïhtsegem utnedh. Tjïjhtje pronovmene-dåehkieh gååvnesieh. Maahtah vielie dej bïjre grammatihke-gærjesne lohkedh.

Adjektijvh leah baakoeh mah jïjtsevoeth jallh kvaliteeth buerkiestieh, guktie vuesiehtimmien gaavhtan:

guhkies, onne, tjeehpes

Gosse adjektijve oktegh raajesisnie, dellie dïhte lea substantijvine. Guktie vuesiehtimmien gaavhtan:

Lyövlehkem guadta.
Båetebe bueriebasse.

Mijjieh nomenh gaektsine kasusinie sojjehtibie, akten-taalesne jïh gellien-taalesne.

Voestegh tjoerebe daejredh man gellie lïhtsh baakoe åtna, jis gööktelïhtsen-nomene jallh golmelïhtsen-nomene.

Gööktelïhtsen-nomenh leah nomenh mej leah göökte lïhtsh vuesiehtimmien gaavhtan bïenj-e jïh nomenh mej leah njieljie lïhtsh, vuesiehtimmien gaavhtan:

åår-e-dæjj-a, sop-tse-stimm-ie

Golmelïhtsen-nomene golme lïhtsh åtna, vuesiehtimmien gaavhtan:

gaa-me-ge, åe-ru-ve

Ij nominatijve-hammoe sojjehtimmieminngie-gietjiem utnieh jïh mijjieh daam hammoem baakoe-gærjine gaavnebe, guktie vuesiehtimmien gaavhtan:

gærja, skuvle, gaevnie, barkoe, mobijle

Lohkh vielie sojjehtimmien bïjre grammatihke-gærjesne.