Kva meiner vi med tryggleik?
Med tryggleik på arbeidsplassen tenkjer vi på at vi skal vere trygge mot farar som kan vere skadelege for liv og helse.
I dei fleste serviceyrka er det fare for psykiske påkjenningar. I hotell- og restaurantbransjen kan dei risikere dårleg inneklima og støy. Yrkessjåførar kan bli utsette for både psykiske farar, ulykker og andre påkjenningar. Heilt fri for risiko kan arbeidsplassen aldri bli.
Kva seier arbeidsmiljølova om tryggleik?
Lover og forskrifter krev at vi avgrensar farane og dei verste konsekvensane.
I Arbeidsmiljølova (aml) finn vi reglar om at arbeidstakarane ikkje skal utsetjast for uheldige fysiske eller psykiske påkjenningar, mellom anna i § 4-1 (2), § 4-4 (1) og § 10-2 (1).
Risiko og farekjelder
Med risiko meiner vi sjansen for at noko uønskt skal skje, og dei følgjene det kan få. Det er mange farekjelder på ein arbeidsplass: støy, kjemikalium, maskinar, arbeid i høgda, tunge lyft, stress osv. Risikoen avgrensar seg ikkje til fysiske tilhøve.
Med unntak av yrkessjåførar er det ikkje spesielt stor fare for alvorlege ulykker i serviceyrka. Derimot kan det finnast stress, samarbeidsproblem og belastningssjukdom.
Muskel- og skjelettplager saman med psykososiale faktorar som stress og konfliktar er ofte årsak til skadar og sjukdom.
Med risiko meiner vi sjansen for og konsekvensane av at noko uønskt skal hende eller utvikle seg, ifølgje Arbeidstilsynet.
Risikoanalyse
Arbeidsmiljølova og Internkontrollforskrifta § 5 krev at alle bedrifter skal kartleggje risikoen på arbeidsplassen for å finne ut kva som kan føre til skadar eller sjukdom. Kartlegginga gjer det mogleg å vurdere om vi har gjort nok for å førebyggje skadar og ulykker. Arbeidsgivaren har ansvaret for å gjennomføre denne kartlegginga.
Omfanget av ei risikovurdering varierer med storleiken på arbeidsplassen og kva slags arbeid som går føre seg. I mange bedrifter er det få og relativt enkle farar å takle, og vi treng ikkje vere ekspertar på tryggingsspørsmål for å handtere dei.
Tre enkle spørsmål utgjer kjernen i risikovurderinga:
- Kva kan gå gale?
- Kva kan vi gjere for å hindre dette?
- Kva kan vi gjere for å redusere konsekvensane dersom noko går gale?
Når kartlegginga har vist kva som bør forbetrast, er neste steg at leiaren, arbeidstakarane og representantane deira i samarbeid planlegg og prioriterer tiltak. Verneombod og arbeidsmiljøutval skal nyttast der slike finst.
Ein enkel risikoanalyse
Ei enkel risikovurdering kan gjerast i fire steg:
Steg 1: Finn farekjeldene
Steg 2: Kva kan skje, og kor sannsynleg er det (konsekvensar)?
Steg 3: Kva kan vi gjere for å hindre det?
Steg 4: Tiltak og vidare arbeid