Utanlandske reisemål

Opne bilete i eit nytt vindauge

CC BY-NC-SA

Bilete: Knut-Erik Mikalsen

God økonomi og betre transportvilkår har gjort det mogleg for mange nordmenn å dra utanlands på ferie. Det blir meir og meir vanleg å reise langt av garde. Dei fleste oppsøkjer sol og varme. Reiseselskapa tilbyr stadig nye fjerne reisemål, både pakketurar og «skreddarsydde» opplegg for par eller mindre grupper.

Ferdigpakka turar til Syden gjekk i førstninga stort sett til landa kring Middelhavet. Særleg Spania og Hellas var viktige reisemål for pakketuristane. Men stadig fleire er interesserte i å oppleve fjernare folk og kulturar, andre religionar og å teste eksotisk mat. Nordmenn reiser i dag på ferie til alle verdsdelar. Ei mengd reiseoperatørar tilbyr ferdigpakka turar.

Med interrail kan du reise i Europa med tog. Ordninga blei lansert i 1971 og gjaldt først ungdommar under 21 år. I dag gjeld interrailpasset for ungdom, barn, vaksne og seniorar. Interrail er særleg populært hos ungdommen.

Verda ligg open om du og vennene dine har lyst på ein spesiell ferie. De kan planleggje turen på eiga hand eller kontakte eit selskap som legg til rette for spesielle turar – med eller utan reiseleiar.

Inspirasjon til og informasjon om spesialturar finn du mellom anna i reisemagasin og på ulike nettstader. Du kan òg google land og stader du ønskjer å vurdere som reisemål.

Dersom du har funne ein stad du kunne tenkje deg å reise til, kan du få eit direkte inntrykk av staden ved hjelp av Google si kartteneste Google Maps. Tenesta dekkjer heile verda med kart, flyfoto og satellittbilete.

Turisme er reiser for å oppleve noko hyggeleg. Stadig ser vi kåringar av det beste ferielandet i verda, dei beste øyane og badestrendene. Feriedraumen og forventningane til ein ferie varierer. For å bli ein fornøgd turist må ferieopplevinga overstige forventningane våre.