Kvar skal vi reise?
Mange fer utanlands til sol og varme i ferien. Men dersom vi fritt kunne velje eit feriemål i heimlandet – utan å tenkje på kva det kostar – ville vi kanskje oppdage spennande reisemål?
Dess betre du kjenner ditt eige land, dess lettare er det å finne eit tiltalande feriemål. Det er enkelt å finne informasjon om Noreg som ferieland. Veit du om ein stad du har lyst til å gjeste, kan du søkje informasjon om denne staden. Veit du ikkje kvar du vil reise, kan du bruke Internett til å finne informasjon om norske feriestader.
Du kan til dømes bruke søkjestrengen «Noreg som ferieland», eller du kan gå inn på ein nettportal:
Attraksjonar og kultur (http://www.visitnorway.com)
Her finn du utførleg informasjon om stader og attraksjonar over heile landet.
«Rutebok for Norge» (http://www.rutebok.no)
På denne sida finn ein fylkesvis informasjon om aktivitetar, attraksjonar og opplevingar. Eiga liste over turistkontor, turoperatørar og guidar, kart og annan reiseinformasjon.
Du kan sjølv finne andre nettstader som inneheld nyttig informasjon når du skal velje eit feriemål.
Korleis kjem vi dit?
Ta fram eit noregskart. Sjå kvar dei moglege feriemåla ligg i høve til heimstaden din. Korleis er vilkåra for transport?
Når du har funne eit reisemål, kan du spørje:
Korleis kjem du deg til reisemålet?
Kva slags form for transport liker du best: fly, tog, bil eller båt? Kva er prisane for dei ulike transportmåtane?
Når du kjem fram til reisemålet, har du behov for lokal transport. Korleis kjem du deg rundt på reisemålet? Du må sjekke lokale transporttilbod. Bruk til dømes «Rutebok for Norge».
Finn du andre attraktive stader på vegen mellom heimstaden og reisemålet?
Kva slags tilbod om transport finn du på sjølve reisemålet?
Kva finn vi på reisemålet?
Når du har funne eit feriemål, har du eit godt utgangspunkt for ei god ferieoppleving og kan tilfredsstille feriedraumen din.
Ein måte å sjekke ut om feriedraumen kan gå i oppfylling, er å finne ut korleis det aktuelle feriemålet kan dekkje grunnbehova til den reisande.
Den reisande har fire grunnbehov:
- transport – å reise
- overnatting – å bu
- servering – å ete og drikke
- attraksjonar og attraksjonar – å sjå, oppleve og gjer