Produktorientering
Produktorientering er ein blant fleire filosofiar ein bedriftsleiar kan ha om kva som er viktig for at organisasjonen skal nå måla sine. Ein vanleg tanke innan denne filosofien er at bedrifta må tilby produkt av betre kvalitet enn konkurrentane. Her ser vi gründeren av butikkjeda Bunnpris, Trond Lykke, som vaskar ein av Rolls-Royce-ane sine.
Ein modell har på seg ei pelskåpe over ein raud kjole på motemoloen.
Bjørn Jacobsen i Grønn Hverdag meiner sparedusjen til 89 kroner reduserer straumrekninga til ein familie på fire med 3 100 kroner i året.
Treng vi eigentleg ei betre utgåve av musefella?
Ein produktorientert leiar vil kunne seie: «Vi må tilby betre produkt enn konkurrentane våre. Det er kvalitet marknaden ønskjer.»1.
Er det så sikkert at det alltid er kvalitet marknaden ønskjer? Kan det vere andre eigenskapar som er vel så viktige? Og kva er eigentleg kvalitet? Er kvalitet det same som at plagget har lang levetid, at saumen på plagget er bein, eller at designen varer i lang tid? Kvalitet for deg treng ikkje vere det same som kvalitet for bestemora di. Kvalitet kan bli oppfatta både objektivt og subjektivt, og veldig ofte er det nok kvalitetsoppfatninga til bedriftsleiaren som er utgangspunktet - ikkje kunden si. Det er lett å bli «forelska» i produktet ein produserer, og dermed gløyme kva kunden eigentleg ønskjer seg. Ein tenkjer at ein lagar noko genialt som kunden ikkje kan unnvere, men er det sikkert at det er dette kunden vil ha?
Eit døme er sparedusjen som blei lansert ein gong på 90-talet. Ei enkel oppfinning der det blir blanda luft inn i dusjvatnet slik at ein bruker mindre varmt vatn og på den måten reduserer straumrekninga. Dette er både miljøvennleg, billeg og lurt. Men kvifor har ikkje alle ein slik dusj om det reduserer straumrekninga? Nokon synest kanskje ikkje at straumrekninga er så høg at det er nødvendig å spare. Nokon synest kanskje at sparedusjen ikkje ser særleg elegant ut, og nokon synest kanskje at det er meir behageleg at det kjem mykje vatn og ikkje luft ut av dusjen. Det treng ikkje å bety at sparedusjen ikkje er eit godt produkt, men det illustrerer at produktet ikkje er godt for alle. Dersom ein skal produsere og selje til dømes dusjhovud, må ein lytte til kunden og ikkje berre tru at ein veit kva kunden vil ha.
Har du høyrt om «musefelleteorien»?
Dei som trur at suksess er eit resultat av berre det å produsere eit betre produkt enn konkurrenten, har noko å lære. Musefelleteorien seier at dersom ein lagar ei betre musefelle enn konkurrenten, vil kundane snart finne fram til denne nye fella og stå i kø for å kjøpe henne. Kva tenkjer du om det? I så tilfelle ville det vere relativt enkelt å vere ein som produserer og sel varer og tenester.
Men i dag er det eit så stort tilbod av varer at den nye musefella druknar i det heile. Dersom ein ikkje fortel forbrukarane at den nye musefella finst, og ikkje forklarer kva det er som gjer henne betre enn konkurrentane si musefelle, er det lite sannsynleg at ho overlever på marknaden. Og først og fremst bør ein forsikre seg om at det faktisk eksisterer eit behov for ei betre musefelle.
Her ser du ein video om ei kreativ heimelaga musefelle:
- 1. . 1997. Markedsføringsledelse.
Tilrå
