Grossisten som mellomledd
Grossisten er eit ledd mellom produsent og detaljist der varene ofte blir pakka om frå større einingar og fordelte rundt til detaljistar. Ein grossist har ofte produkt frå mange produsentar eller leverandørar og skal betene eit geografisk område med desse varene. Grossisten kjøper altså varer eller tenester frå produsentar eller leverandørar og sel varene til detaljistar.
Eit grossistlager kan betene ein verdsdel som Europa, ei gruppe land som Skandinavia, eit land som vårt eige, ein by som Oslo eller eit fylke som Oppland.
Dekningsområdet avheng av kva som er formålstenleg ut frå bransje, type produkt og tal på kundar.
Utforming av lageret
Lageret er vanlegvis bygt opp slik at hovuddelen av bygningsarealet er til å lagre varer i, medan ein mindre del er sett av til mellom anna administrasjon, garderobar, matrom, serviceverkstad og ladestasjon for handteringsutstyr. Utandørs er det gjerne godt med plass til å parkere og manøvrere distribusjonsbilar og vogntog.