Tjaelije jïjtse dååjrehtimmieh jïh åssjaldahkh nuhtjie, jïh tuhtjie vihkielåbpoe hijven gyhtjelassh gihtjedh goh dejtie minngemosth vaestiedasside åehpiedehtedh. Argumentasjovne aktene essayesne lea daamtaj tjeakoes – tjaelije ovmessie gïeleldh vierhkie-vierhtieh nuhtjie juktie sov vuajnoem buektedh.
Akte persovneles essaye lea akte ussjedallije teekste mij tjïelkelaakan lea subjektijve. Ij leah dan striengkies krïevenassh argumentasjovnese jïh guktie teekste lea bigkeme daennie teekstesne goh faage-teekstesne. Lohkije edtja buerebe tjaelijem dåeriedidh aktene åssjaldahke-vaanterdimmesne teeman sisnjelen. Tjaelije byöroe sjugniedihks jïh væjkele årrodh tjaeledh. Ij tjoerh ajve maam akt utnedh jiehtedh, men tjuara aaj buektiehtidh sov åssjaldahkh buektedh naemhtie guktie satne lohkijen ïedtjem gååske jïh sjollehte.