Fløytekrem
Piska kremfløyte kan vi bruke naturell, eller vi kan tilsetje ulike smaksstoff. Fløyten må vere kjøleskapskald for å få best resultat når vi piskar han. Kremen bruker vi som fyll i ulike kremkaker, som pynt eller som ein eigen kremdessert.
Smørkrem
Denne kremen lagar vi av smør, sukker og smaksstoff. Enkelte smørkremar kan òg innehalde egg, fargestoff og stivelse. Smørkrem blir brukt som fyll og dekor på kaker.
Vaniljekrem
Kokt vaniljekrem er laga av egg, sukker, mjølk, fløyte og vanilje. Denne kremen bruker vi som kakefyll, som tilsetjingar i smørkremar for å redusere feittinnhaldet og som stabilisator i andre kremar. Kokt vaniljekrem kallar vi òg ekte vaniljekrem.
Kaldrørt krem
Kremen er basert på eit industriframstilt pulver som er laga av sukker, smaksstoff, farge og bindemiddel. Vi blandar pulveret med væske, rører blandinga godt, og kremen er klar til bruk.
Glasurar
Føremålet med glasuren er å gi ein fin utsjånad samstundes som han forsterkar smaksinntrykket frå produkta. Glasur bruker vi som overtrekk eller pynt på konditorprodukt.
Melisglasur lagar vi av melis og vatn.
Eggekviteglasur lagar vi av melis og eggekvite.
Sjokoladeglasur lagar vi av fløyte og sjokolade.
Speilglasurar lagar vi av sjokolade, fløyte, gelatin, blank overtrekksgelé eller kondensert mjølk og eventuelt fargestoff.
Hugs!
- Kremar og glasurar blir brukte som fyll i eller på kaker og bakverk.
Ein krem kan òg serverast som ein eigen rett på dessertbordet, til dømes trollkrem og moltekrem.
Glasurar framhever produktet, kan forlenge haldbarheita og gjer mykje for sanseinntrykket.