Bidragsmetoden

Opne bilete i eit nytt vindauge

CC BY-NC-SA

Bilete: Maskot

Stine har fagbrev i kokkefaget og har jobba lenge i hotell- og restaurantbransjen. Ho er no medeigar i ein liten restaurant som òg driv cateringsverksemd.

Stine har hatt eit møte med eit sambuarpar som ønsker å kjøpe mat til bryllaupet sitt. Dei har funne fram til ein treretters meny både ho og kunden trur skal passe godt. Paret kan maks betale 30 000 kroner inklusive mva., og Stine lurer på om det vil vere lønnsamt for ho å ta på seg oppdraget.

Ho bruker bidragsmetoden for å berekne kor stort dekningsbidrag oppdraget vil gi ho. Det vil seie kor mykje dette oppdraget vil bidra med i kroner for å dekke dei faste kostnadene for bedrifta og ei forteneste.

Salspris utan meirverdiavgift

Det første ho må gjere, er å berekne salsinntektene eksklusive mva., som betyr salsinntekt etter at meirverdiavgift er trekt i frå. For cateringsverksemd er meirverdiavgifta på 15 prosent.

$$\begin{gathered} \frac{\mathrm{salsinntekt} \mathrm{inkl}. \mathrm{mva}.}{1,15} = \mathrm{salspris} \mathrm{ekskl}. \mathrm{mva}. \\ \end{gathered}$$

$$ \frac{30 000 \mathrm{kroner}}{1,15}= 26 087 \mathrm{kroner}$$

Variable kostnader

Stine må så berekne dei variable kostnadene. Ho finn ut at råvareprisen for ein treretters meny til 60 personar er 15 000 kroner.

• Frakt til Stines lagar kostar 500 kroner for alle råvarene.

• Stine veit at ho må ha 2 kokkar på jobb i 8 timar med ei timelønn på 200 kroner for å klare oppdraget ($$ \mathrm{8\; ·\; 2\; =\; 16\; timar}$$, $$ 200 \mathrm{kroner}·16 \mathrm{timar}=\; 3 200\; kroner$$).

Berekne dekningsbidraget

Når Stine har rekna seg fram til kor store variable kostnader oppdraget vil gi ho, kan ho berekne dekningsbidraget. Då tek ho salspris utan meirverdiavgift og trekker frå dei variable kostnadene.

Berekne dekningsgraden

Ho kan òg berekne kva dekningsgrad oppdraget vil gi, det vil seie kor stort dekningsbidraget er i prosent av salet utan mva. Ved å berekne dekningsgraden er det lettare å vurdere lønnsemda til dette oppdraget samanlikna med andre oppdrag.

Dekningsgrad: $$ \frac{7 387 \mathrm{kroner} · 100}{26 087}=28,3 \%$$

Stine ønsker seg helst ein dekningsgrad på over 30 prosent. Men ho veit at mange av gjestane i bryllaupet er unge, ugifte par som kan vere framtidige kundar om ho leverer eit bra produkt. Stine synest det er viktig å vise seg fram for desse potensielle kundane og å hindre vekst hos konkurrenten. Ho bestemmer seg derfor for å ta oppdraget.