Krambua AS er ein gammaldags landhandel i ei lita norsk bygd. Eigarane av landhandelen har planar om å pensjonere seg, og ingen av etterkommarane har til no hatt lyst til å ta over landhandelen. Då ein av sønene høyrer at det er planar om å leggje ein hovudveg rett forbi staden der landhandelen ligg, får han lyst til å ta over etter foreldra. Bygningen som landhandelen ligg i, er på 120 kvadratmeter, og han vurderer å byggje ut. Det er store areal rundt bygget til nybygg og parkeringsplassar. Det er mange uløyste spørsmål rundt framtida for landhandelen, blant anna kva kjede ei ny daglegvareforretning bør vere knytt til.
Du blir spurd om råd om kva den nye eigaren bør gjere, og du skal gjere følgjande:
a. Lag ei oversikt over daglegvarekjedene i Noreg. Foreslå kva den nye eigaren bør gjere når det gjeld kjedetilknyting.
b. På kva område kan den nye eigaren ha fordel av å samarbeide med andre?
c. Lag eit forslag til korleis ytre og indre salsmiljø bør utformast.
Noko av det som har hindra sonen i å reise tilbake til heimbygda, er at han driv eit importfirma i Oslo og sel moteklede.
Han ønskjer råd frå deg om korleis han kan ta med seg denne verksemda når han flyttar heim. Han har vurdert å halde fram med verksemda delvis via netthandel og delvis via telefonsal, og han ønskjer blant anna svar på følgjande spørsmål:
d. Kva bør han gjere med tanke på fordelar og ulemper knytte til dei ulike salsformene?
Importbedrifta har eit ordrekontor og eit lager i Oslo. Dette vil han etter kvart flytte til heimbygda. Ei av utfordringane med dette er kommunikasjonen med kundane.
e. På kva måtar meiner du han kan kommunisere med kundar og leverandørar?
Både i daglegvarehandelen og i importbedrifta er det behov for nye datasystem.
f. Korleis kan daglegvarehandelen og importbedrifta bruke IKT som salsverktøy?
Når det gjeld korleis oppgåvesvaret skal utformast, bør det innehalde ei framside, innhaldsliste, topptekst, sidenummerering og kjeldetilvisingar. Du bør presentere stoffet på ein oversiktleg måte med overskrifter og avsnitt, og du kan godt bruke illustrasjonar, bilete og figurar – dei seier mange gonger meir enn ord.
Vurdering
I vurderinga av oppgåvesvaret blir det lagt vekt på om du har følgt punkta nedanfor:
| Nivå 1 | Nivå 2 | Nivå 3 |
| Gjer greie for samarbeidsformer i daglegvarebransjen. | Foreslå samarbeidsformer for Krambua AS. | Vurder kor viktig samarbeid med andre er. |
| Foreslå tiltak i ytre og indre salsmiljø. | Vurder eigne forslag til tiltak. | |
| Gjer greie for kommunikasjonsprosessar. | Foreslå korleis kommunikasjonen med kundar og leverandørar kan gå føre seg. | Vurder forslaga. |
| Gjer greie for bruk av IKT i salssituasjonar. | Foreslå forskjellig bruk av IKT i salssituasjonar. | Vurder forslaga. |