Koking
Før koking bør grønsakene reinsast eller skrellast. Dei bør ha ein jamn størrelse for å bli jamt kokte. Kok grønsakene i vatn som er tilsett 7–8 g salt per liter, eller i kraft. For å ta best mogleg vare på C-vitamina skal grønsakene leggjast i vatnet når det koker.
Puré
Grønsaker som skal bli puré, skal alltid kokast først. Deretter skal dei mosast, anten i kvern, hurtighakkar eller passeringsapparat. Grønsaker med lite stivelse må tilsetjast puré av grønsaker med mykje stivelse, ris eller béchamel.
Stua
Grønsaker som skal stuast, blir alltid delte opp og eventuelt kokte på førehand.
Fløytestua
Fres grønsakene. Slå på kremfløyte og kok inn til ein tjukk krem. Smak til.
Stua i béchamel
Kokte, oppdelte grønsaker kan tilsetjast ein fyldig béchamel. Stuinga skal ha ein konsistens som ikkje er for fast, men som flyt langsamt utover.
Stuing av tørka grønsaker (erter og bønner)
Vask grønsakene og legg dei i kaldt vatn til 6–8 timar før koking. Slå av vatnet og kok grønsakene i nytt vatn. Pass på at det ikkje koker tørre. Kok grønsakene til dei er møre. Er det for mykje væske i kjelen, må noko av ho hellast av. Tilset smør, salt, farin og eventuelt andre krydder.
Salamander: omn med overvarme eller jern som gløder, og som blir halden over ein rett som skal gratinerast eller glaserast.