Bruk av søkjemotorar
Internett har gjort det mogleg å integrere løysingar der ein kan søkje etter produkt- og prisinformasjon, lese og leggje inn brukaropplevingar og bestille. Tilsynelatande er dette eit «Kinderegg» som gir forbrukarane stor påverknadskraft. Nokre (få) av dei mest kjende er tripadvisor.com, trivago.com, hotels.com og booking.com.
Kva meiner andre?
Kunden har store fordelar av å kunne samanlikne pris og kvalitet opp mot opplevingar andre gjester har hatt. Samtidig er det nokre viktige feilkjelder. Først og fremst er det eit skilje mellom dei som baserer seg på vurderingar frå gjester som faktisk har budd på hotellet eller ete på den aktuelle restauranten, og dei som er opne for omtalar frå alle. Dei sistnemnde er det lettare å manipulere.
Marknadsmakt
Dei største nettstadene for bestilling av reise og opphald kan få svært stor marknadsmakt. Jo fleire kundar som bruker nettstadene, desto høgare krav kan dei stille til reiselivsbedriftene som skal delta. Om éin eller nokre få nettstader får ein monopolliknande posisjon, kan vi oppleve at prisen for å distribuere digitalt blir høgare enn da reisebyråa gjorde den same jobben utan dagens teknologi.
Mange reiselivsbedrifter er svært aktive når det gjeld å oppmode gjestene til å skrive positive kommentarar og gi dei høg rating. I nokre få tilfelle kan dette grense mot uetisk påverknad, ikkje minst om ein får tilbod om gåver for å gi slike omtalar. I dei aller fleste tilfella er slike løysingar med på å skjerpe kvaliteten og servicen, noko som er til felles beste for alle.