Overnattingstilbod
I mange tilfelle er det overnattingstilbodet som blir utgangspunkt for den vidare planlegginga og pakkinga av ei total reiseoppleving. Særleg gjeld dette større grupper innanfor kurs- og konferansemarknaden.
Informasjon til gjester og kundar
Mange hotellresepsjonar er blitt det viktigaste kontaktpunktet for informasjon om lokale opplevingar og attraksjonar. For at resepsjonisten skal fungere som eit slikt «turistkontor light» må han eller ho ha både informasjon om og eit personleg nettverk på sin eigen destinasjon.
I somme tilfelle kan behova som gjesten eller kunden har for informasjon og råd, utfordre lojaliteten til tenestene som hotellet yter. Det mest typiske er når gjesten ønskjer å ha varierte lokale matopplevingar. Å tilrå andre serveringsstader enn hotellet sine eigne tilbod, kan bety tapte inntekter, men samtidig kan det styrkje opplevinga som gjesten får av eit breitt tilbod på destinasjonen.