Utfordringar i transport
Uregelmessig arbeidstid, søvn og kvile gjer at spesielt buss- og lastebilsjåførar er utsette for typiske livsstilssjukdommar. Ei undersøking som blei offentleggjord i 2011, tyder på at tilsette i transport og samferdsel trivst dårlegare på jobben enn folk i andre yrke.
Buss- og lastebilsjåførar har nokre spesielle HMT-utfordringar. Mange i denne yrkesgruppa har eit usunt kosthald, lite fysisk aktivitet, uregelmessig døgnrytme og søvn og høgt stressnivå. Sjåførane blir i stor grad ramma av typiske livsstilssjukdommar. Du kan lese meir om livsstilssjukdommar her:
Lenkje: Livsstilssykdommer
Innanfor transport og kommunikasjon blei det i 2005 rapportert om 2 033 ulykker. Trafikkulykker med tunge køyretøy fører ofte til alvorlege person- og materiellskadar.
Transport av farleg gods/ADR på veg står i ei særstilling og er regulert av forskrift om landtransport av farlig gods, som Direktoratet for samfunnstryggleik og beredskap har ansvaret for.
Bruk av truck, løftekraner og anleggsmaskiner inneber stor risiko på arbeidsplassar. Risikoen for klemskadar og uhell ved bruk av truck er unormalt stor.
Du kan lese om HMT og internkontroll innanfor transport og logistikk her:
Yrkessjåførdirektivet
EU har innført eit direktiv (yrkessjåførdirektivet) med krav om obligatorisk yrkesutdanning for å heve kompetansen hos yrkessjåførane på tunge køyretøy (buss, lastebil over 3 500 kg) i heile Europa.
I Noreg er dette følgt opp med ei eiga forskrift om grunnutdanning og etterutdanning for yrkessjåførar (yrkessjåførforskrifta).
Heving av kompetansen skal betre trafikktryggleiken og tryggleiken for sjåførane i samband med jobben, også når køyretøyet står stille.
Arbeidstid, køyre- og kviletid
Mange trafikkulykker kjem av at trøytte sjåførar ikkje er merksame nok. Førarar av tunge køyretøy skal følgje forskrift om kjøre- og hviletid for vegtransport i EØS.
For å kontrollere at reglane for køyre- og kviletid blir følgde, skal slike køyretøy ha fartsskrivar. Denne forskrifta kjem i tillegg til dei norske føresegnene i arbeidsmiljølova om alminneleg arbeidstid (§ 10-4).
Lenkje: Arbeidsmiljølova § 10-4
Tiltak
Krise- og beredskapsleiing
Det viktigaste er å unngå ulykker. Men dersom ulykka først er ute, er det om å gjere å avgrense konsekvensane. NHO Transport har utarbeidd ei handbok i krise- og beredskapsleiing. Formålet er primært å førebyggje ulykker, men også å førebu beredskapsleiinga i transportbedriftene på kva tiltak som må setjast i verk når ei ulykke først har skjedd.
Lenkje: Håndbok i krise- og beredskapsledelse
Kompetanselyftet
Etter innspel frå NHO Transport i samarbeid med Norsk Transportarbeiderforbund og Yrkestrafikkforbundet har Vegdirektoratet utvikla eit opplæringstilbod for bussjåførar. Dette kompetanselyftet er sentralt i HMT-arbeidet. Det ser ut til at tiltaket verkar, og det blir rapportert om færre skadar og lågare sjukefråvær.