Merkevara Noreg

Opne bilete i eit nytt vindauge

CC BY-NC-SA

Bilete: Willy Haraldsen

Merkevara Noreg handlar om å posisjonere Noreg ved å fortelje ei felles historie om kven vi er, kvar vi kjem frå, og kva vi kan tilby.

Ei god merkevare blir kjenneteikna av at produktet har verdi og får tilleggsfordelar i kraft av sjølve namnet eller merket. Vidare må produktet stemme overeins med dei forventningane forbrukarane har til produktet. Merkevara Noreg har lykkast når Noreg har eit godt omdøme internasjonalt, og når vi blir assosiert med positive verdiar og kvalitetar.

Å merkevarebyggje Noreg handlar mellom anna om å vidareutvikle Noreg som reisemål nasjonalt og internasjonalt. Det betyr at vi må gi turistane positive opplevingar som lever opp til bilda dei har av reisemålet Noreg.

Profileringa av merkevara Noreg skaper forventningar om korleis vi er som ferieland. Vi ønskjer at Noreg først og fremst skal bli oppfatta som eit berekraftig og ansvarleg land, med rein, forfriskande og autentisk natur.

Opne bilete i eit nytt vindauge

CC BY-NC-SA

Bilete: Svein Wik

Organisasjonen FutureBrand forskar på verdien av nasjonale merkevarer. Årleg gir dei ut rapporten Country Index, som ser på kva verdiar og kvalitetar dei ulike landa blir assosierte med globalt. I 2020 er Noreg rangert på tredje plass av til saman 75 land. Japan ligg på første og Sveits på andre plass. Ta ein titt på FutureBrand Country Index 2020 (PDF).

Noreg blir assosiert med rein og flott natur, velferd, høg kompetanse innan teknologi og digitalisering, og blir rekna for å vere langt framme på berekraftig utvikling. FutureBrand skriv i rapporten sin at forbrukarar er meir tilbøyelege til å reise til og kjøpe produkt og tenester frå land som dei har eit godt inntrykk av.

Det finst fleire norske bedrifter som har klart å vinne fram i den internasjonale marknaden, som til dømes Ekornes med merkevara Stressless og Jøtul med den kjende Jøtul-omnen. Likevel er det framleis eit stort potensial for norske merkevarer på den internasjonale marknaden. Ei sterk nasjonal merkevare, med positive assosiasjonar, kan vere godt å ha i ryggen for norske bedrifter som vil satse internasjonalt.

Innovasjon Noreg er opptekne av å bidra til å posisjonere Noreg som banebrytande på berekraftige løysingar. Visste du til dømes at den første heilelektriske bilferja i verda går på norske fjordar? Eller at Noreg står bak den første flytande vindparken i verda?

Sterke inntrykk med små avtrykk

Den nasjonale reiselivsstrategien fram mot 2030 har visjonen "Sterke inntrykk med små avtrykk". Verdigrunnlaget til visjonen er: "Vi skal bli et verdsatt, grønt reiseliv. Vi skal bli det med pionerånd og omtanke – og vi skal bli det sammen!"

Begrensa bruk

Bilete: FN-sambandet