Konkurransefortrinn
Omgrepet konkurransefortrinn er sett saman av konkurranse (tevling, kappestrid) og fortrinn (god eigenskap, fordel). Omgrepet konkurranse kjenner vi frå idretten. Å ha eit konkurransefortrinn her kan til dømes bety å ha betre kompetanse enn konkurrentane om utstyr og treningsmetodar.
I økonomien er konkurransefortrinn effekten av å ha og å utnytte ressursar eller kompetanse som gir fordelar i konkurranse med andre.
Eit land har eit konkurransefortrinn når varer og tenester er billegare enn i andre land.
Det handlar om å ha tilgang til ressursar – pengar, arbeidskraft, naturressursar – og å ha kunnskapar til å utnytte ressursane.
Unike fortrinn?
Innovasjon Noreg har utarbeidd Hvitebok for reiselivsutvikling. Her er det tilrådd å beskrive unike attraksjonar ved eit reisemål, sjå side 36 i kviteboka.
Internasjonalt har vi mange konkurrentar. Her kan du lese om dei 100 største turistattraksjonane, ifølgje amerikanaren Howard Hillman. Norske fjordar kjem på 32.-plass.
Reiselivsnæringa er ei av dei raskast veksande næringane i verda. I regjeringa sin strategi for reiselivet blir det hevda at Noreg har gode sjansar for å ta sin del av den internasjonale veksten.
Kampen om turistane har auka dramatisk. I dag er det ikkje uvanleg med nasjonale reklamekampanjar på internasjonale TV-kanalar.
Norsk reiseliv treng fleire turistar. Vi må spørje:
- Kor mange eineståande naturområde og byggverk finst det i Noreg?
- Må eit reisemål ha eineståande kvalitetar for å trekkje til seg turistar?
Marknads- og kundeorientering
Folk er forskjellige og har ulike ønske og behov. Når vi skal utvikle og marknadsføre reiselivstilbod, må vi vite kva marknad vi ønskjer å betene, og kva konkurrentar vi må rekne med.
Vi må spørje:
- Kva for ønske og behov har noverande og framtidige kundar?
- Kva tilbyr dei største konkurrentane våre?
- Korleis kan medarbeidarane våre utnytte informasjonen om kundar og konkurrentar i utvikling og leveranse?
Vi må altså kjenne kundane våre: Er dei gamle eller unge, einslege eller barnefamiliar? Er dei interesserte i natur eller kultur, sol eller badeliv? Ønskjer de ein stille og fredeleg ferie eller fest og moro?
Vi kan oppnå konkurransefortrinn dersom produkta våre dekkjer ønska og behova til kundane.