Relasjonskompetanse
Å opptre korrekt som vertskap handlar også om relasjonskompetanse. Dette vil ikkje seie at vi skal endre personlegdom, men at vi tilpassar oss til det enkelte mennesket og ikkje minst til den aktuelle situasjonen.
Det er viktig at vi kan relatere oss til alle typar menneske og samtidig har evna til å setje oss inn i situasjonen til enkeltmennesket. Åtferda vår skal spegle verdiane til bedrifta og vere med på å skape eit positivt inntrykk.
Alle menneske skal bli tekne på alvor. Viser vi medkjensle, forståing og empati i dei ulike situasjonane, byggjer vi opp gode relasjonar og gir god gjestebehandling. Evne til å skape tillit og innsikt i ønska og behova til andre menneske er grunnleggjande for å skape gode relasjonar.
Tenk deg at du jobbar på eit hotell. Ein gjest ber om hjelp til å bestille ei drosje. Gjesten sit i rullestol, men du legg ikkje merke til denne viktige detaljen. Du ringjer etter drosje som vanleg, og når drosja kjem, er det ein vanleg bil som ikkje kan ta med ein gjest i rullestol. Gjesten blir sjølvsagt opprørt, og det blir stilt spørsmål ved evnene dine til å handtere situasjonen til gjesten.
På kva måte kan du få gjesten til å ha tillit til deg og selskapet du jobbar i, etter dette? Kva ville du ha gjort i dette tilfellet?
Tenk over
Tillit er avgjerande for gode relasjonar mellom menneske.
Sosial kompetanse
Å vere sosial er å fungere saman med andre menneske og å samarbeide med andre. Å ha kompetanse er å ha kunnskapar og evner.
- Kunnskap – praktisk og teoretisk innsikt og forståing i arbeidet
- Evner – å kunne handtere situasjonen
Vi er alle meir eller mindre sosialt kompetente. Ein person med stor sosial kompetanse har lettare for å tilpasse seg nye situasjonar og nye menneske.
Ein person med mindre sosial kompetanse treng trygge og kjende omgivnader for at kompetansen skal kome til sin rett.
Tenk over
Ein god vert og serviceytar blir aldri heilt utlært, men vil heile tida trene og oppdatere seg på dette området.