Kvifor er oppvarming viktig?

Idrettsskade
Fotograf: Jean-Christophe Bott

Førebyggje skadar

Det er velkjent at oppvarming kan førebyggje skadar.

Med oppvarming blir musklane smidigare. Kroppen får tid til å førebu seg på aktiviteten som kjem.

Innhaldet i hovudaktiviteten avgjer korleis du bør utforme og gjennomføre oppvarminga. Di meir intens hovudaktiviteten er, di viktigare er det at du varmar opp.

Prestasjonsevna aukar

Muskelarbeidet blir meir koordinert og samstemt. Det fører til at prestasjonane betrar seg etter ei god oppvarmingsøkt.

Oppvarming skjerpar sansane. Nerveimpulsar og meldingar frå
hjernen til muskulaturen går raskare. Vi reagerer og oppfattar
fortare, og vi kan røre oss kjappare.

Når temperaturen stig, skjer det mange kjemiske endringar i
kroppen. Blod og vevsvæske flyt lettare. Oksygen og ulike
næringsstoff blir transporterte raskare gjennom blodbanen og
ut til muskulaturen.

Lysta til å trene aukar

Under oppvarminga skjer det endringar i hjernen òg. Vi merkar
at humøret blir betre, og at lysta til å trene aukar.

Etter 20 minutt med fysisk aktivitet skil kroppen ut stoff som
verkar smertestillande og gjer oss oppstemde. Derfor er det viktig at vi kjem raskt i gang med oppvarminga.

På denne måten blir oppvarminga ei mental førebuing til det du skal gjere etterpå. Du konsentrerer deg om det du held på med, og motivasjonen aukar.