Transport av lause varer
Tanktransport er ein vanleg transportmåte innanfor bulktransporten. Innanfor vegtransport bruker vi gjerne omgrepet bulktransport i daglegtale når vi snakkar om transport av laus masse i tankkøyretøy. Transport av flytande væsker kallar vi gjerne tanktransport.
Slik kan vi skilje mellom tankpåbygg alt etter om dei fraktar flytande væske eller faste stoff i laus masse. Ein bil som fraktar til dømes kraftfôr, som på biletet over, blir kalla bulkbil, mens ein bil som fraktar til dømes mjølk til meieria, blir kalla for tankbil.
Bulktransport
Tørre bulkstoff er korn, sement, gjødsel, sukker, mjøl og så vidare. I bulktransport bruker ein avanserte tankpåbygg. Normalt lastar og lossar ein ved at stoffa blir droppa, eller sleppte, på og blir tippa eller pumpa av. For å hindre forstopping når lasta skal av, bruker ein til dømes trykkluft for at lasta skal bli flyktig.
Når ein skal skifte last, må ein reingjere tankane grundig. Reingjeringa kan ein gjere på spesielle anlegg for tankreingjering, eller ein kan gå ned i tankane og koste. Då er det viktig at ein følgjer dei tryggingsprosedyrane som gjeld.
Tanktransport
Transport av farleg gods
Den største gruppa av våte stoff som blir transporterte i tank på vegen, er drivstoff til køyretøy. Dette er farleg gods, og transporten er underlagd spesielle reglar. Føraren må ha gjennomført ei spesialisert opplæring og bestått krava til ADR-kompetansebevis for tankkøyring, sjå artikkelen ADR-kompetansebevis.
Tankbilar som fraktar farleg gods, skal ha oransje ADR-skilt med påskrift om fareklasse og UN-nummer for stoffet som blir transportert.
Mjølketransport
Transport av mjølk består i å hente mjølka hos produsentane og køyre ho til meieriet for vidare foredling. Denne transporten kjem sjølvsagt ikkje inn under ADR-reglane. Det som er spesielt med mjølketransporten, er hygienekrava. Ein tek prøver av mjølka både hos produsenten og inne på meieriet, og etter lossing vaskar ein tankane grundig. Tankane er isolerte, slik at ein ikkje får problem med frost eller varme.
Tankutforming
Tanken på eit køyretøy er vanlegvis delt inn i fleire rom, slik at det er mogleg å transportere varer av ulik kvalitet og utnytte vektkapasiteten til køyretøyet. Romma kan ha slingreskott, som hindrar lasta i å bevege seg raskt frå ei side til ei anna.
