Vi har no sett på ei rekkje ulike trendar som bedrifter må ta omsyn til når dei skal vidareutvikle seg. Spørsmålet er då: Korleis bør bedrifta tilpasse produkta og tenestene sine etter desse trendane?
Vaskepulver som døme
Her skal vi ta for oss ein vaskepulverprodusent som døme og sjå nærare på korleis han kan tilpasse seg trendane i dagens samfunn.
| Trendar | Korleis kan produsenten tilpasse seg? | Dømet med vaskepulverprodusenten |
|---|---|---|
| Demografiske endringar | ved å følgje med på utviklinga – Statisk sentralbyrå har statistikk | Det har vore ei utvikling mot at vi får fleire og mindre hushald – mange einslege med og utan barn. Har dette noko å seie for produktutviklinga av vaskepulver? Bør vi satse på mindre pakningar? |
| Internasjonalisering | ved å følgje med på utviklinga i heile verda | Verda er marknaden. Kva for delar av verda kan vi vurdere å selje til? |
| Raske endringar | ved å vurdere om produkta krev rask produktutvikling | Vaskepulver er ikkje ein type produkt der utviklinga skjer kontinuerleg. |
| Service | ved å vurdere kva slags service bedrifta kan tilby | Vi kan lage ei heimeside med gode råd om vask – det kan oppfattast som god service. |
| Design | ved å designe emballasjen slik at han blir finare og meir praktisk | Vi kan tilby refillpakningar og spesielle dyrare pakningar som ser bra ut og fungerer godt. |
| Kravstore forbrukarar | ved å tilby eit produkt som fungerer betre enn før | Vi kan tilby meir brukarvennleg emballasje, enklare dosering og eit forbetra produkt som vaskar både reint og skånsamt |
| Miljø | ved å vurdere om produktet kan få ein miljøprofil | Vaskepulver inneheld kjemikaliar som bør vere testa slik at dei ikkje framkallar allergi eller liknande. Likeins bør pulveret vere mogleg å bryte ned og ikkje forureine naturen. Refillpakningar kan vere ei moglegheit også her. |
| Helse og sunnheit | ved å sjå på om produktet kan knytast opp mot helse og sunnheit | Når ein trener og er aktiv, må ein vaske kleda etterpå. Vi kan kommunisere at vaskepulveret fjernar sveitte og vond lukt. |
| Brukarmedverknad i tenesteproduksjon | ved å vurdere brukarmedverknad dersom bedrifta produserer tenester | Vi tilbyr ikkje tenester, så dette er ikkje aktuelt for oss. |
| Brukarmedverknad i produktutvikling | ved å vurdere å engasjere brukarar i arbeidet med å forbetre produktet | Vi kan opprette ei Facebook-side og lage aktivitetar som kan engasjere brukarane. Kanskje kan vi stimulere til tips ved å premiere gode forslag. |
Oppgåve
Lag din eigen tabell som viser korleis produkta flyreiser og mobiltelefonar kan tilpassast trendane.
CC BY-SASkrive av Mette Holan. Rettshavarar: NKI Forlaget og Amendor AS
Sist fagleg oppdatert 10.04.2018