Marknadsmål vil seie dei måla du set deg med marknadsføringa. Poenget med å setje slike mål er at bedrifta skal ha noko å strekkje seg etter. Mål er viktige både for økonomisk styring av bedrifta og for motiviasjonen til dei tilsette.
Når bedrifta arbeider med marknadsplanen, må også måla som har med økonomi og marknad å gjera, formulerast. Måla blir sette ut frå den kunnskapen bedrifta har om marknaden, og kva moglegheiter bedrifta har til å lykkast med salet sitt.
Måla kan uttrykkjast til dømes i salsvolum, marknadsdel eller lønnsemd.
Døme på kvantitative marknadsmål
- Omsetninga skal neste år vere 12 millionar kroner.
- Marknadsdelen vår skal neste år aukast til 25 prosent.
- Dekningsgraden skal neste år vere 40 prosent.
Måla over er moglege å kvantifisere, det vil seie at dei kan talfestast. Det finst også mål som i mindre grad er moglege å kvantifisere.
Døme på kvalitative marknadsmål
- Bedrifta vår skal gi den beste servicen på marknaden.
- Bedrifta vår skal ha dei hyggjelegaste seljarane.
Når marknadsmåla er avklate, kan bedrifta begynne å arbeide med sjølve marknadsstrategien.
CC BY-SASkrive av Mette Holan. Rettshavarar: NKI Forlaget og Amendor AS
Sist fagleg oppdatert 16.05.2018