Regionruter
I alle fylke finn vi eit regionsenter med eit breitt tenestetilbod som folk i distriktet har behov for av og til (sjukehus, bank, forsikring, faghandel med meir). I tillegg har dei som bur i regionsenteret, av og til behov for å reise til omlandet. Dette gir eit trafikkgrunnlag for rutesamband mellom distrikta og regionsentera.
Slike ruter følgjer hovudvegane inn mot regionsentera. Undervegs matar lokale bussruter regionrutene med passasjerar i knutepunkt langs traseen. Figuren nedanfor viser prinsippet. Busselskapet JVB (sjå lenkje i margen) held til på Fagernes i Oppland. Selskapet trafikkerer blant anna strekninga Lærdal–Gjøvik. På kartet ser du korleis lokale bussruter korresponderer med regionsambandet på Fagernes.
Ekspressbussruter
Kollektivtransport med buss høver godt på korte og mellomlange avstandar. Mange vel å ta buss også over lengre avstandar. Selskapet NOR-WAY Bussekspress administrerer eit samarbeid mellom 25 ruteselskap og tilbyr ekspressbussruter mellom større byar i Sør-Noreg.
Ekspressbussrutene følgjer stort sett stamvegnettet.
