Daate soptsese gærjeste «Lohkede saemien».Knut Bergsland jïh Ella Holm Bull gærjam tjaaleme jïh jaepien 1993 gærja trygkesovvi. Daennie soptsesisnie åadtjoeh govledh mij heannadi goh Jupmele Brorkem råaki.
Brorke
Goh Jupmelen Baernie lij vaadtsehtjeminie daennie eatnamisnie, dle lij akte ledtie man nomme lij brorke. Dïhte lij dan alvas stoerre ledtie jïh dle dan soe brorri gosse haeliehti.
Ikth goh Jupmelen Baernie båata vaedtsien, dle dïhte brorke aaj lij dagkoe. Men guktie Jupmelen Baernie hïerpi gosse dle brorke haalani. «Ae datnem gujht amma tjoerem unniedidh, ih gujht amma numhtie maehtieh brorredh jïh beltedh,» Jupmelen Baernie jeahta.
Jïh dle veelti jïh unniedi dam ledtiem, dosse daase joekedi dehtie brorkeste.
Bovtse aaj åadtjoeji ohtje stuhtjetjem. Dïhte stuhtje lea dunnie ruaksjesne. Vååjnoe joekoen dïhte goh veelkes-laaketje.
Brorke lea daelie barre onne ladtetje. Nåå brårra gujht daelie aaj, jalts ij gujht ov man tjarke, jallan govloe.
Relatert innhold
CC BY-NC-SASkrevet av Knut Bergsland og Ella Holm Bull.
Sist faglig oppdatert 22.11.2018