Saemien jïh boelt-aajjan dååjvehtse
Guhkiem daan åvtelen man bïjre edtjem daelie soptsestidh.
Lopme abpe laantem alvas guhkiem gaptjeme. Ånnetji die sjalkesti, jïh laante eelki vååjnedh. Smaave daarhvetjh bïevline sjïdtin. Kraasetjh aaj. Voestes juvre bööti gåatoen. Bovtse dïhte. Dan mïnngesne jis saemie, bovtsen almetje.
Ånnetji die boelt-aajja aaj mïnngesne slåahra-raejkien bööti vaedtsien. Ij lij gujht dïsse jïjnjem gaavnedh bårredh, eelki bovtsijste åesiem vaeltedh. Idtji goh saemie dam Iyjhkh, juktie bovtsh lin sov. Dejtie hov Raane-nïejteste åådtjeme.
Saemie boelt-aajjese måarahtovvi, jïh jeahta: «Aellieh daejstie mov bovtsijste vaeltieh goh! Ollem datnem buvvieh!»
Boelt-aajja jeahta. «Mestie edtjem jieledh jis im manne aaj luhpiem åadtjoeh bovtsh bårrelidh seamma guktie datne?»
Saemie jeahta: «Jielieh amma datne aaj kraesijste burhvijste guktie bovtse.»
Boelt-aajja dïsse. «Nov gujht maaje, manne gujht aaj tuhtjem bearkoeh jïh buejtieh njaelkie.»
Saemie: «Bovtse lea mov. Dam hov Raane-nïejteste åådtjeme.»
Boelt-aajja: «Vööjnim hov mov duekesne jïjnjh gertelh aaj mïnngesne båetieh goeren. Dah sih aaj bovtsijste ussjedieh bårrelidh. Guktie vïenhth datne oktegh bovtside nahkesjh geehtedh gosse jïjnjh dejstie gertielijstie båetieh?»
Saemie: «Mejtie sïjhth munnjien viehkine årrodh bovtside geehtedh?»
Boelt-aajja: «Jaa, jis ohtje baalhketjem åadtjoem. Jis neastetjem munnjien aaj sååjhtoe, dle edtjem datnem viehkiehtidh bovtsem jïh laantem gertielijstie geehtedh.»
Saemie gujhth dåajvoehti.
Bïerne vihth: «Aktem vihth dååjvehtsem datneste krïebpesjem.»
Saemie: «Mij sån badth dïhte?»
Boelt-aajja: «Jis sååjhtoe naakenem mov såeleste buvvedh, dellie galkh tjaebpieslaakan dåemiedidh - mannem heevehtidh jïh mov vueliem joejkedh, måarojde tjiehpieslaakan öörnedh jïh dujmieslaakan juvledh.»
Saemie: «Dam aaj dåajvohtem.»
Boelt-aajja: «Jis monnen dååjvehtsem åajeldh, dellie edtjh laantem dassedh, jïh guktie dellie vïenhth dej dov bovtsigujmie?»
Naemhtie dam dah guaktah seamadigan.[1]
Baakoeh
Saemien | Daaroen |
|---|---|
dååjvehtse | løfte |